ПОДЕЛИТЬСЯ

Таразда жүргізуші куәліктерін заңсыз сатқан 7 тұлға сотталды,- деп хабарлайды Tengrinews.kz тілшісі Бас прокуратура мәліметіне сілтеме жасап.

2023 жылдың қыркүйегінде облыстық Полиция департаментінің қызметкерлері жедел іс-шаралар барысында Тараз мамандандырылған Халыққа қызмет көрсету орталығында (МХҚКО) жүргізуші куәлігін заңсыз сатқан адамдар тобын әшкереледі.

"МХҚКО-ның 2 қызметкері,1 программист маман,4 делдал алдын ала сөз байласу арқылы ақша қаражатына Жамбыл,Түркістан және Алматы облысының 21 тұрғынына заңсыз жүргізуші куәліктерін жасаған.

Аталған азаматтар бұрын емтихан тапсыра алмай,көлік жүргізу құқығын алмаған",- делінген хабарламада.

Атап айтқанда,Тараз қалалық МХҚКО-ның қызметкері өзінің сыбайласы болып табылатын Алматы қалалық МХҚКО-ның программист-маманы арқылы Түркістан облысының тұрғынын практикалық емтихан тапсырмағанына қарамастан,емтиханнан сәтті өткенін ақпараттық жүйемен растаған.

"Ал ақша қаражаттары емтихан тапсырушылардан 100 мыңнан 200 мың теңгеге дейінгі көлемде түрлі облыстардың делдардары арқылы Тараз қалалық МХҚКО-ның қызметкеріне жиналып,араларында өзара бөлінген".

Ведомство мәліметінше,20 азаматқа қатысты осы тектес қылмыстық схема орындалған.

27 ақпанда Тараз қалалық №2 сотымен МХҚКО-да заңсыз жүргізуші куәлігін сатқан адамдар тобына қатысты айыптау үкімі шықты.

Сот үкімі бойынша,кінәлі тұлғаларға 3,6 жылмен 4,6 жыл аралығында бас бостандығынан айыру жазасы тағайындалып,шартты деп танылды. Сондай-ақ,қылмыстық қудалау органының талабы бойынша жүргізуші куәліктері жарамсыз деп танылды.

Сот үкімі заңды күшіне енген жоқ.