ПОДЕЛИТЬСЯ

Талдықорғандағы қылмыстық істер жөніндегі мамандандырылған ауданаралық сотта Шерзат Болаттың өлімінің себебі айтылды,- деп хабарлайды Tengrinews.kz тілшісі.

Мемлекеттік айыптаушы Дана Сәрсембайдың айтуынша,жасөспірімнің өлімі көп мөлшерде қан жоғалту салдарынан болған.

"Сот-медициналық сараптамаға сәйкес Шерзат Болаттың өліміне сол жақ кеуде тұсындағы пышақ жарақатынан көп мөлшерде қан жоғалту себеп болды. Оның қайтыс болғаны 4 қазанда сағат 01:30-да Талғар аудандық ауруханасында расталды",- деді Дана Сәрсембай.

Сондай-ақ,Шерзаттың денесі мен басынан көптеген жарақат анықталған.

Процесс Жетісу облысы Талдықорғандағы Қылмыстық істер жөніндегі мамандандырылған ауданаралық сотының ғимаратында өтіп жатыр. Айыпталушылар орнында тоғыз адам отыр.

Бұған дейін Алматы облысы Полиция департаменті Шерзат Болат ісі бойынша тергеу аяқталғанын хабарлаған еді. Тергеу аясында 40 сот сараптамасы жүргізіліп,200-ге жуық куәгерден жауап алынған. Барлық күдіктімен оқиға болған жерде жауап алу,іске қатысушылар арасында беттестіру және қылмыстың барлық мән-жайын анықтауға бағытталған басқа да тергеу әрекеттері жүргізілген.

Сегіз бейнематериал зерттеліп,қылмысқа қатысы бар барлық адамға құқықтық баға берілді. Қылмыстық істің көлемі 62 томнан тұрады.

Еске салайық,Талғарда 2024 жылы 4 қазанға қараған түні жасөспірім көз жұмды,кейінірек өңірдің Полиция департаменті осы оқиғаға қатысты мәлімдеме жасады. Ал марқұм Шерзаттың отбасы бұл жайтқа қатысы барлардың бәрін ұстап,жазалауды талап етті. Қалаға ІІМ тобы жіберілді.

Сонымен қатар,Алматы облысы Полиция департаментінің өкілі Талғардағы жаппай төбелесте күдіктілер қандай суық қару қолданғанын айтты.

Кейінірек полиция тағы да мәлімдеме жасап,халық арасында тараған "Талғардағы жасөспірімнің өліміне бандиттердің қатысы бар" деген ақпаратқа пікір білдірді. Ал 12 қазанда Шерзат Болаттың үйі өртеніп кетті. Артынша марқұмның отбасын полиция күзететін болды.