ПОДЕЛИТЬСЯ

Талдықорғанда Шерзат Болаттың (Полат) өліміне қатысты іс бойынша сот процесі жалғасып жатыр. Сот отырысы бұған дейін желіде тараған айыпталушылардың видеосын талқылаудан басталды. Қоғамда резонанс тудырған кадрлар сот залында дау туғызды,- деп хабарлайды Tengrinews.kz тілшісі.

Жарияланған видеожазбада айыпталушылардың кабинадан күлімсіреп шығып бара жатқаны көрінеді. Бұл әлеуметтік желі қолданушылары мен қоғам арасында наразылық толқынын тудырды.

Отырыс барысында видеоның авторы мен оны таратушыға қатысты пікірталас туындады. Адвокаттардың бірі сотта оның мобилографы жұмыс істегенін айтты,алайда дәл осы видеоны оның көмекшісі түсірмегенін жеткізді.

Судья Ержан Жанұзақов роликтің таралу дерегі бойынша тексеру жүргізіліп жатқанын мәлімдеді.

Процесс Жетісу облысы Талдықорғандағы Қылмыстық істер жөніндегі мамандандырылған ауданаралық сотының ғимаратында өтіп жатыр. Айыпталушылар орнында тоғыз адам отыр.

Бұған дейін Алматы облысы Полиция департаменті Шерзат Болат ісі бойынша тергеу аяқталғанын хабарлаған еді. Тергеу аясында 40 сот сараптамасы жүргізіліп,200-ге жуық куәгерден жауап алынған. Барлық күдіктімен оқиға болған жерде жауап алу,іске қатысушылар арасында беттестіру және қылмыстың барлық мән-жайын анықтауға бағытталған басқа да тергеу әрекеттері жүргізілген.

Сегіз бейнематериал зерттеліп,қылмысқа қатысы бар барлық адамға құқықтық баға берілді. Қылмыстық істің көлемі 62 томнан тұрады.

Еске салайық,Талғарда 2024 жылы 4 қазанға қараған түні жасөспірім көз жұмды,кейінірек өңірдің Полиция департаменті осы оқиғаға қатысты мәлімдеме жасады. Ал марқұм Шерзаттың отбасы бұл жайтқа қатысы барлардың бәрін ұстап,жазалауды талап етті. Қалаға ІІМ тобы жіберілді.

Сонымен қатар,Алматы облысы Полиция департаментінің өкілі Талғардағы жаппай төбелесте күдіктілер қандай суық қару қолданғанын айтты.

Кейінірек полиция тағы да мәлімдеме жасап,халық арасында тараған "Талғардағы жасөспірімнің өліміне бандиттердің қатысы бар" деген ақпаратқа пікір білдірді. Ал 12 қазанда Шерзат Болаттың үйі өртеніп кетті. Артынша марқұмның отбасын полиция күзететін болды.